BURINA & MICHINA - Laurea in armenta

BURINA: - L’atra smonna ta m’hai dicc d’l’afari del ciclu d’l’armenta t’at ricordi?
MICHINA: - Ozà ch’am ricord...T’avi dicc che la Gelmini la fa bütè ‘na laurea aposta: dutur an smaltiment d’l’armenta.
B.: - Propi parigg, adess per trè vea la roba ut tuca ciapè la laurea sed’no m’è’t fai ? T’sai pü ‘ndonda branchè...Ciapa la tòla vióla, ciapa cula gialda...No, tra vea tütt an cula outa e neira...A la fen t’capissi pü niente...La tòla marón t’devi ampinila duminica per u l’indmòn, cul’atra d’l’ater culur l’è per la ròba bagnaja ma t’devi bütila d’fóra d’la porta quondi ch’uj’è u su. Quondi ch’el piovf uj va cula con la pel del salam e ‘l bueli del pulaster...At capì ?
M.: - No ! E ‘l triciclu andò t’al büti ? Um tuca mangè el bueli del pulaster ?
B.: - Adess lassla buji...C’mensa a piè ‘na laurea per vòta se d’no la va a finì ch’it dòn el Nobèl per la diferensiaja.
M.: - Set dizi adess? La diferensa...Che diferensa...?
B.: - Cul che t’ho dicc prima...La tòla russa, cula verda..l’atra pü cita...At capì ?
M.: - Ahhh, sei, sei... t’fai la separasion an cà, per avei mea d’confüzion...Pô l’Amiu, ‘na vòta rivà davzën au cimiteri ut’l’armüscia tüta ansèma. La diferensa l’è isa: tè t’la dividi e lur, per fèt in piazì, it’la bütu ansèma.
B.: - Ozà, per forsa, lur j’hon stüdià..Eh! A vigti nenta...El diretur d’l’Amiu l’è mea jën c’mè siséja vè ! L’è in inginié, ouhh!!
M.: - Porca l’oca um tuca turna ‘ndè scóla per trè vea l’armenta...Ma cul ch’j’ho nent capì l’è l’afari del triciclu cumbinà ansema a sta diferensa d’la malura...
B.: - Ossiniurrrr...lassla buji, sad’no it peju nenta...njonca a l’università d’la quarta generassion!! E pô, sta da senti, l’è tròp facil !! Quondi che t’hai bütì da part el buèli del pulaster, la pel del salam, la sgröja d’l’ovf, el rësghi d’janciüuji... el foji düri d’l’arcicioc, am racumond taja vea el spénni chi von an t’la tòla verda... Ecu...con sta ròba chi, t’hai giónti ‘n’po’ d’còla d’pëss, antónt t’büti a buji in bel pignatón d’acqua e limón e con in chigiarón, pusibilment ancura sporch d’tumatica du dì prima, t’at büti a girè, a girè, a girè, fina tònt ch’uj vén fóra ‘na pü bela crema tipo gelateina e con ista t’póri fè ‘l pulaster ‘n carpión.
M.: - U m’è m’nì ‘n po’ ónzi ma fa niente... set vóri mai...sa devf piè la laurea...
B.: - Ohh, là...A viggh che t’stai bütonda la testa a pòst ! L’è c’sé ch’uss fa !
M.: - Pü che fè c’sei...c’sé ca devf fè ? Tònt la plastica, el veder e atra ròba du generr i la voru njònca pü ‘n Cina. E l’afari ch’um piass tònt l’è ‘l porta a porta...Acsé a pöss vighi d’avzën Bruno Vespa !!
B.: - Ma vaaaaa, l’è mea c’m’è t’hai dicc tei. Tè t’hai dicc: el porta a porta...aveci l’è: “Porta ! Porta!” An t’el sens che l’armenta t’la devi gamalè tè, fina a l’Amiu. Aj suma adess Michina ?
M.: - Pü ciarr che c’seji...!! Uà adess at salütt ch’a devf andè a crumpè in para d’müdondi per mé marì...A só nent se pieji culi con el gombi o in slip. Uj’è culi che dadnon j’hon in sachëtt che del vòti u s’ampiniss, del vòti menu...I son faci per cuj preciss...cuj chi bütu vea la ròba con cugnissión...Uj’è onchesé in taji per la porta d’emergensa. Anveci pô uj’è u slip bionc ma con iss mé marì us mea l’Uomo Ragno e uj büta trop an mustra cul’arciciocch bela sëcch...set vóri mai...
B.: - T’hai razón, tücc pastiss uj’è ‘ngir...Uj’è onche culi ch’jon la masa da besboll dadnón o la masa da golf...A só nenta ma mé marì uramai, al massim, el masa i sans’oss.
Ciau, sta ben, bónna müdondada, a s’avguma lündess.

Ferry

POST RECENTI