Burina & Michina
Vacònsi e ulimpiadi
BURINA: - Alura ‘me c’la va? T’ei stacia véa tütt l’istà, a t’hó pü vist an gir... Comunque grassie d’la cartulen-na che ta m’hai mandà da Türen, con la mola...
MICHINA: - Ma che mola, che Türen, set dizi... A scrivti ancura aquila con la “C”?... A suma andacc a vighi l’Iulimpiadi.
B.: - Ah, sé, a j’ho capì, andó ch’i fòn cui còn citt, citt, col mur ch’u smeja ch’jabu tampunà in tir...
M.: - Brava, brava, pròpi lé andö ‘t dizi té, a Pechino. La mola la sareissa la Mole e pô l’è nent Türen. A t’ho mandà ‘na fòto ‘d ’na pagòda an pó pü outa d’iatri e te ta t’ei scunfundia con cula ch’l’à facc tó nonu Antonello... uà che cugnisión !
B.: - Uà che che mé a j’ho ‘na cultüra neeehh!...A vót ‘na prova? Me marì u m’ha spiegà che zü da lé…pü o menu…a Pechino, uj’è nasì Pacinotti, cullà ‘d la dinamo... e mé a j’hó dicc: “Va ‘nòn aruabi s’l’è d’la dinamo el ven da Kiev, la famusa squadra ‘d balon... el vó dì ch’l’è nasì an Rüsia, gnurònt !”
M.: - T’hai facc ben... Set vori mai... Mea ammachi u tó l’è gnurònt... El mé u m’ava dicc ch’i favu u tir del marté al’Iulimpiadi... Uss n’è niònca antajà ch’l’era nent in marté ma ‘na bucia con in fi tacà da drera che i cuncurent i duivu branchè col mon... orcu dujvi vighi che cuncurent ch’jeru ! ònche sé ‘l doni: del ganassi chi finivu pü, doi ciambronni che s’iss sa stacavu i favu el bogg an tera... con di manassi chi brancavu ant’isa corda d’fer c’m’è che mé a bronc an t’in fidlen an bró e pô ad surpreisa i tacavu a girè, a girè, a girè semp’ pü fort, semp’ pü fort, semp’ pü fort... Menu male ch’j’hòn dacc cula bucia pesònta in quintal, altrimenti i cuncurent anveci ‘d parti bei e dricc i sareissu vulà veja ‘cme ‘n Sputnik.
B.: - Va ben ma chi ch’l’à vensì ?
M.: - Antzën! Antzën ch’u seja riusì a ranchèsi da cula pedon-na. Us vig che cula bucia l’era tròp pesònta. Anveci che i cuncurent uj partiva la bucia con tütt el fi tacà e vigliac se ‘na vòta, sa bala d’fer, l’è andacia a sbati ant la rei ‘d prutesion... U s’anfilava semper ant’l’ünica pòrta druerta ch’u j’era e csei uj’era d’jòmi ch’i andavu sübit a piantè in palëtt pèr marchè chi ch’l’ava sbaglià, col risic ad pièsi ‘na bucià ant la tèsta. Ma mé a digg... si cineis i fòn qualunque ròba pèr fè di sold. Pô, a j’ültim trei, cui ch’iavu sbaglià pü che j’ater, j t’acavu n’afari al còl per fèj turnè au lur pais e i sunavu fina l’inno perché ch’i s’a sbaglieisu nenta ad andè ant in’atra nasión. Però i pudivu pü garegè per quatr’ani ‘d fila... Isa sé ch’l’è disiplina e urganizasion ! J davu ònchesé in mass ad fiù da purtè a cà ‘d Lauren d’la sità andó chi stòn.
B.: - Chi ch’a l’è Lauren, Michina ?
M.: - Ossignurr an che stat che t’ei!! Cà ‘d Lauren u sarreisa u cimiteri, andó ch’i pòrtu i mòrt! Ist l’è niente, mé am scrediva ad vighi ‘n afari straurdinari, a son andacia apòsta pèr vighi s’afari lé e pô u j’era nenta... i l’òn scancelà ‘cme ‘n vul dl’Alitalia ! A prupòsit, t’hai sentì ? Finalment is son bitì d’acordi, per forsa…urramai uj’armaniva ammachi pü cui reuplon chi vòn con l’elastich !
B.: - Sé ch’j’hó sentì, i pudivu ammachi pü purteti d’an piasa d’Armi, ant’la Fraschëta a mangè i rabatón ! Ma se t’am divi... che té duivi vighi ‘na ròba da ógg fóra d’la tèsta ? Se ch’l’era mai ?
M.: - I m’avu dicc ch’u j’era el lancio del giovanotto ! Anveci i giuvnòtt i curivu da matt ma pô tütt ant in mument i frenavu, i cambiavu idea e i travu vea ‘na póncia longa e anuissa perché j’eru tücc ma propi tücc, anrabià ‘cme del bestji con d’iatri umen vistì ‘d biònc... ch’i sercavu ad nent fèsi anflisè. Grami umen, orcu i cineis i son pròpi gram neh ! Anveci ‘d dèi d’i scüd per pudeisi riparè, j davu del bandierein-ni biònchi e rusi ! Ben u rest at la chënt in’atra vòta adess aj’hó d’andè al Còni a vighi se Pareti um rimbursa almenu la metà del biëtt ‘d l’aereo ch’a j’hó ciapà pèr Pechino perchè j’hòn nent mantnì cul ch’i m’hòn prumetì ‘d vighi.
B.: - Va püra at salüt e ‘t vigherrai che Roberto Pareti ut rimbursa el biëtt tütt antrei perchè lü l’è jën ad paròla, ater che i cineis ! Ciau.
Ferry
