Burina & Michina
‘Na lima nent’ in limon
BURINA: - Ciao Michina, c’m’èla mai che t’ei bionca e rusa c’m’è ‘n limon nent tratà e tüta vistja ‘d nejer c’m’en capè da previ ?
MICHINA: - Ehhh…Cara la me Burina a son an lütu, a m’è mort el canaren, a m’è mort…!
B.: - Orcuuuu, sa fissa au tó post a m’andreiva a trè suta au trenu. Ma at nent vergogna con tücc i prublema pü gross cuj’è ‘l mond !!!
M.: - Ma set vori mai capì tei ‘d uzé. T’n’hai maj vist jën tei ! A digg el canaren neh ! Serca ad nent pensè a l’anatomia ma ammachi all’ornitologia ! Auriva trèm dabön suta au trenu, tont disperaia c’a i’era ma j’hon gavà i pasagi a livé ! Um tucava rampgnemi con ongi e snugg per andè ans’el rutaji e se pô a rabat dabass, am sciapp la gnuta e a morr ? C’m’è ca fass a masemi suta au trenu ? L’è mea tont facil neh !
B.: - A j’ho nenta capì bèn l’ültim pasagi ma fa niente. Del vòti t’smeji c’m’è la nostra Gionta an Cumën: “ Andremo, faremo, risolveremo “ che pô l’è tont c’m’è dì: “Chi vagu, chi fasu e is rongerron “ ! Amnuma a noi...se cu t’è capità co’s canaren anvilinà ?
M.: - Ben Bureinna dam ‘n po’ ‘d cunsulasion almenu tè...stamm da senti...T’al saji che a mé im piazu i canaren. Mudestament aj’ho pü uzé me che la Licia Colò. Ma...se t’hai capì...Ossignurr, va ben, piont’la lé...Pensa ammachi a roba c’la vula ! Ecco, l’ater dì ajava crumpà in pü bel canaren, bionc, russ, giald e vert.
B.: - Scüsmi in mument...Ma alura l’era in papagal, nent in canaren ?!
M.: - At digg c’ad’ no, l’era in canaren ! In canaren varietà “Technicolor “ ! Adess t’hai capì ? ‘Na varietà rara...il vendu ammachi ant’ el vegg colorificio Papa ! Adess parla pü e sta da senti. A son rivaja a cà e aj’ho bütì el mangim an ti só cit tirët, jën per dì, set tirët an tütt. Pô a la sira a l’ho cuatà con u strass bleu ansüma d’la gabia, per fel drumì pü ben, eh pü che c’sé set vori ? Ma au dì dòp a bunura a son andacia a vighi ma l’ava mongià nionca ‘na furuaja. A l’ho uardà ben, ben d’avsen e am son dicia: “A dev andè dal mé amis el mez da bosc” e anlura am son sgagiaja...
B.: - No ma scüsa ‘n mument...perché ch’el canaren el mongia nenta t’vai dal mez da bosc ? Se t’aurivi dèji ? D’l’arsium al post del mangim ?
M.: - Nooooo, a m’era antajaia che sa grama bestia l’ava nenta el bèch a pari !
B.: - Ah ecco, a pari...facc a ics !
M.: - Ma no, l’è mea ‘na schedeina d’la sisal ! L’ava la part da suta del bech c’la tirava an pô pü tont an s’la dricia e alura mé j’ho pensà: s’aj dagg ‘na limadenna da cula part lé, al port a pari e lü, gram uzé, u riess a mangè ! At capì, Burenna ?
B.: - Ma perché, anveci d’ fè culesion d’canaren, t’fai nenta la racolta di francubul ? Almenu devi nent né limè, né deji da mangè, al masim devi deji ‘na barlicà per tacheji ans’l’album !
M.: - Ma va ‘non, sta citu. Lassmi parlè, tei che t’ei nionca bonna a fè la “O” col bicer ! Alura a vagg là da Giuani el mez da bosc e aj ciam ‘na lima cita – cita nent’in limon e lü u m’ha ciamà se c’a dujva fè e mé aj l’ho spiegà: ‘na lima cita per limeji el becch al canaren...
B.: - E lü u t’avrà uardaja c’m’è cus uarda cul là c’l’andava con cana e lensa per pischè el litureini dal cavalcavia !
M.: - Orcu che testa anuissa che t’hai...Lü anveci u m’ha dicc che se mé aj tucch el becch al canaren con ‘na lima, el canaren el morr ! Ma mé, che mudestament ad canaren am’n’antend, aj’ho dicc ch’u staga tranquil e per el canaren e per la sô lima che magara u s’as crëd ch’aj l’a restituissa pü. Lü u m’ha dicc che con tüti el limi c’l’ha l’è onca bón a regalemla, ch’uj n’anfà d’niente, né d’la sô lima e nionca del canaren ma che second lü tucondji el bech con la lima, onche s’lè cita, el canaren el morr. Ma mè, uà Burenna, se ch’um n’an fa ad cul cu diss is urgiön. Aj’ho pià la mé lima, onsi la sô limëta da doj lindricc e a son andacia a cà dal me pover canaren.
B.: - Ozà e pô t’hai vist, ch’l’ava razón lü...T’hai drubà ‘na lima per in gram canaren e ‘l canaren l’è mort.
M.: - Ma vaaa ! L’è mea mort per la lima, veh !
B.: - Ah, no ? E per che roba anlura ?
M.: - L’è stacc quond’c’l’ho bitì ant’la morsa !
B.: - Uà t’am faj amnì onzi, a vagg a cà...Per ‘na smonna a voj pü vighti !
Ferry
